Það var mikið stuð og stemning á Egilsstöðum á föstudag þegar þorrablót bæjarins fór fram. Um er að ræða langfjölmennasta þorrablót Egilsstaða frá upphafi.

Þorrablótsnefnd kom gestum á óvart með Barbie-þema sem féll vel í kramið hjá gestum. Meðlimir nefndarinnar fóru alla leið og klæddu sig upp sem Barbie og Ken.

Góðlátlegt grín var gert að íbúum bæjarins í fjölmörgum leik-, söng- og dansatriðum. Undir lok skemmtidagskrár steig á svið strákabandið EGS-guys, skipað nefndarmönnum, og tók tvö lög við mikinn fögnuð viðstaddra.