Crossfit-stjarnan Sara Sigmundsdóttir er ástfangin upp fyrir haus. Kærastinn heitir Luke Ebron og er kvikmyndagerðarmaður og Crossfit-íþróttamaður. Sara óskar sínum heittelskaða til hamingju með afmælið á Instagram og birtir nokkrar myndir af ævintýralegu lífi þeirra saman. 

Miðað við viðbrögðin sem Sara hefur fengið við færslunni hefur það komið þónokkrum aðdáendum hennar á óvart að hún eigi kærasta. 

Í færslunni á Instagram segir Sara Ebron vera uppáhaldsmanneskjuna sína. Hún þakkar honum fyrir að hugsa um sig, fyrir að styðja sig og kenna sér þolinmæði. Sara segir hann hafa stórt hjarta og vera umhyggjusaman. Hún nefnir einnig að hann sé góður ferðafélagi en það er augljóst á myndunum sem hún deilir að þau hafa farið víða.