Fjöldamorð á gasvinnslusvæði

Sýrlenskir uppreisnarmenn hafa átt í átökum við ISIS eins og ...
Sýrlenskir uppreisnarmenn hafa átt í átökum við ISIS eins og hermenn stjórnarhersins. AHMED DEEB

Að minnsta kosti 115 hermenn stjórnarhersins í Sýrlandi létust í dag eftir að skæruliðar úr röðum ISIS eða IS réðust á gasvinnslusvæði í Homs héraði í Sýrlandi. 

Samkvæmt sýrlenskum mannréttindasamtökum eru atburðirnir í dag stærsta árás ISIS í landinu eftir að samtökin blönduðu sér í átökin þar á seinasta ári. 

Áður en að ríkisstjórn Sýrlands staðfesti fréttirnar höfðu stuðningsmenn forsetans, Bashar al-Assad, birt myndir af líkunum og kölluðu árásina „fjöldamorð“. Ásamt hermönnunum létust ellefu óbreyttir borgarar í árásinni. Þó er ekki vitað um afdrif 250 manns af svæðinu, bæði hermönnum og óbreyttum borgurum.

Skæruliðar IS tóku árásina upp á myndband og sýndu þar tugir líka, mörg limlest, á víð og dreif um svæðið. Jafnframt sýnir eitt myndband einn skæruliða stilla sér upp með líkunum og fagna dauðsföllunum. 

Rami Abdel Rahman, framkvæmdarstjóri mannréttindasamtakanna, hefur fordæmt árásina og kallað hana stríðsglæp. „Fjöldamorð er stríðsglæpur hvort sem um er að ræða morð á óbreyttum borgurum eða stríðsmönnum.“

Samtökin IS (eða ISIS) lýstu yfir stofnun íslamsks kalífaríkis í lok júní og hafa tekið yfir stór svæði í Sýrlandi og Írak síðustu vikur. 

mbl.is

Bloggað um fréttina