Rúmar sjö milljónir kjósenda hafa nú tekið þátt í óformlegri þjóðaratkvæðagreiðslu sem stjórnarandstaðan í Venesúela hefur staðið fyrir, að því er BBC hefur eftir fræðimönnum sem fylgjast með kosningaferlinu.
Kona var skotin til bana í gær á meðan hún beið þess að greiða atkvæði og þrír aðrir særðust í árás byssumanna á mótorhjólum við kjörstað í Caracas.
Skelfing greip um sig þegar byssuskot heyrðust í hverfinu Catia í höfuðborginni Caracas. Stjórnarandstæðingar ásaka vopnaða hópa stuðningsmanna stjórnar Nicolasar Maduro, forseta Venesúela, um að standa að baki árásinni. Er hún sögð enn ein birtingarmynd þeirrar miklu spennu sem ríkir milli stjórnarandstöðunnar og forsetans.
Mikil mótmæli hafa verið í landinu undanfarna fjóra mánuði og hafa þau nú kostað um eitthundrað manns lífið.
Búist er við að stuðningsmenn Maduros sniðgangi þjóðaratkvæðagreiðsluna, sem er ekki lagalega bindandi, og að mikil meirihluti þeirra sem taka þátt muni því greiða atkvæði gegn þeirri ætlan Maduros að breyta stjórnarskrá landsins í átt til einræðis.