Búið er að bjarga rúmlega 600 fjallgöngumönnum sem voru strandaglópar á Rinjani-eldfjallinu á indónesísku eyjunni Lombok eftir að öflugur jarðskjálfti reið þar yfir á sunnudag.
Jarðskjálftinn, sem mældist 6,4 stig, hefur kostað 16 manns lífið hið minnsta og rúmlega 160 eru slasaðir. CNN-fréttastofan segir að síðustu sex göngumennirnir hafi verið fluttir niður af fjallinu í morgun eftir umfangsmiklar björgunaraðgerðir sem tæplega 200 lögreglumenn, hermenn og heilbrigðisstarfsfólk tóku þátt í.
Göngufólkið hafði orðið strandaglópar á hinum ýmsu slóðum í fjallinu, en fjöldi skriða féll í Rinjani í kjölfar skjálftans, sem átti upptök sín í nágrenni fjallsins.
Hundruð erlendra ferðamanna voru í hópi þeirra 600 sem bjargað var af fjallinu, að því er Sutopo Purwo Nugroho, talsmaður Almannavarna, greindi frá.
Ekki hefur hins vegar verið greint frá því hvort einhverjir göngumannanna hafi þurft frekari læknisaðstoðar við, en tveir göngumenn voru í hópi þeirra sem létust í skjálftanum. Malasískur ferðamaður, sem var í göngu á Rinjani, og indónesískur göngumaður sem varð fyrir grjóthruni úr fjallinu.
Taílenskur göngumaður, Tipatai Phusit, sagði í samtali við CNN að hann hafi verið á tindi Rinjani þegar skjálftinn reið yfir og að hann hafi séð fjölmarga fá grjót og brak í sig.
Áætla stjórnvöld að á annað þúsund heimila á Lombok hafi skemmst í skjálftunum og hundruð íbúa eru nú heimilislausir, en mikill fjöldi eftirskjálfta hefur riðið yfir eyjuna, sem og nágrannaeyjuna Bali.