Erlent | AFP | 5.9.2018 | 21:15 | Uppfært 23:43

400 hælisleitendum bjargað úr Sahara

Hælisleitendur í Alsír sem alsírsk stjórnvöld eru að senda á aftur heim til Níger. Veruleg fjölgun hefur orðið í hópi hælisleitenda sem hafa verið skildir eftir í Níger og sem gert hefur að koma sér sjálfir yfir landamærin til Alsír AFP

Rúmlega 400 manns frá Vestur-Afríku hefur verið bjargað úr eyðimörkinni norður af Níger síðastliðna tvo daga, að sögn flóttamannaskrifstofu Sameinuðu þjóðanna (IOM).

Það voru björgunarsveitir sem fundu fólkið í nágrenni landamærabæjarins Assamaka. Ekki fylgdi hins vegar sögunni hvort fólkið hefði verið sent aftur yfir landamærin frá Alsír, en mannréttindasamtök hafa haldið því fram að hælisleitendur séu skildir eftir á þessu afskekkta svæði.

Níger er eitt þeirra ríkja sem hælisleitendur ferðast í gegnum á leið sinni til Alsírs og Líbíu, en þaðan reyna þeir síðan að komast sjóleiðina til Evrópu.

Leiðin yfir Sahara er illræmd fyrir þær hættur sem henni fylgja, bilanir bíla eru tíðar, vatnsskortur kemur oft upp og þá skilja harðvítugir smyglarar hælisleitendur stundum eftir í eyðimörkinni.

Um 347 manns frá 13 ríkjum, m.a. frá Malí, Gíneu og Senegal, fundust í Assamaka á mánudag og höfðu komið þangað fótgangandi um nóttina.

Að sögn IOM er búið að flytja flesta þeirra í færanlegar flóttamannabúðir þar sem fólkið hefur fengið vatn, næringu og læknisaðstoð. 92 til viðbótar var svo bjargað í gær.

Verulega hefur fjölgað í hópi hælisleitenda sem hafa verið skildir eftir í Níger og gert að koma sér sjálfir í gegnum eyðimörkina og yfir landamærin til Alsírs að því er IOM greinir frá. Þannig var tæplega 400 manns sem skildir höfðu verið eftir á landamærunum bjargað í júlí á þessu ári.

Stjórnvöld í Alsír hafna því hins vegar alfarið að fólk sé rekið aftur yfir landamærin. Hefur AFP-fréttastofan eftir Noureddine Bedoui, innanríkisráðherra Alsírs, að þetta sé „óuppbyggileg gagnrýni sem ekki sé grundvöllur fyrir“.

Evrópusambandið hefur verið að taka á miklu flæði flóttamanna frá ríkjum Afríku og Mið-Austurlöndum frá 2015 og er Níger orðið eitt þeirra ríkja sem mikill fjöldi fátækra hælisleitenda fera í gegnum. Talið er að um 90% Vestur-Afríkubúa fari þar í gegn.

Smygl á fólki var fært inn í refsilöggjöf landsins árið 2015 og liggur nú allt að 30 ára fangelsisdómur við slíku broti. Nígerski herinn fer einnig í auknum mæli eftirlitsferðir um Sahara-eyðimörkina og í júlí greindi Antonio Tajani, forseti Evrópuþingsins, frá því að flóttamannastraumurinn í gegnum Níger hefði dregist saman um 95% milli áranna 2016 og 2017.