Opin hjartaaðgerð sem Jóhann Karl I, fyrrverandi Spánarkonungur, gekkst undir nýverið gekk vel. Aðgerðin „gekk áfallalaust“ segir í upplýsingum frá sjúkrahúsinu. Hann verður áfram undir eftirliti lækna á meðan hann jafnar sig eins og gengur eftir slíka aðgerð.
Sonur hans Filippus virtist afslappaður þegar hann heimsótti föður sinn á sjúkrahúsið í fylgd móður sinnar, Soffíu. Filippus tók formlega við embætti föður síns fyrir fimm árum fljótlega eftir að upp komst um meiri háttar spillingarfléttu sem Jóhann Karl var sagður viðriðinn.
„Þið hittið mig á leiðinni út,“ sagði Jóhann Karl I glaðlega við blaðamenn þegar hann mætti á sjúkrahúsið í aðgerðina í gær. Þetta er ekki fyrsta aðgerðin sem hann gengst undir um ævina. Í fyrra fór hann í aðgerð á hné og auk þess hefur hann farið nokkrar mjaðmaaðgerðir.
Jóhann Karl I er 81 árs gamall og dró sig formlega í hlé frá opinberum störfum í sumar. Þrátt fyrir það hefur hann sést á hinum ýmsu opinberu viðburðum á þessu ári meðan annars á nautaati í Madrid og siglingakeppni í Finnlandi.
Jóhann Karl tók við embætti þegar Francisco Franco lést, sem var einræðisherra yfir Spáni 1936-1975. Franco tók ákvörðunina um að Jóhann Karl tæki við, þannig að fyrst um sinn mæltist hann að vonum ekki vel fyrir meðal andstæðinga Franco. Smám saman ávann hann sér þó traust þjóðarinnar með því að hafa í heiðri lýðræðisleg gildi.