Alþjóðabankinn Standard Chartered hefur bæst í hóp þeirra fyrirtækja sem hyggjast draga sig út úr frumkvöðlaverkefni Andrésar Bretaprins. Áður hafði endurskoðunarfyrirtækið KPMG gert slíkt hið sama og alþjóðafyrirtækið Aon, sem m.a. býður upp á tryggingar, hefur farið fram á að merki þess verði fjarlægt af vefsíðu verkefnis prinsins sem heitir Pitch@Palace.
Þá sendu nemendur við háskólann í Huddersfield frá sér yfirlýsingu um helgina þar sem þeir fóru fram á að Andrés yrði sviptur heiðursdoktorsnafnbót sem honum hafði verið veitt við skólann.
Greint er frá þessu á vefsíðu breska dagblaðsins The Guardian og þar segir einnig að fleiri fyrirtæki og samtök séu að íhuga tengsl sín og stuðning við málefni prinsins.
Öll spjót standa á hinum 59 ára gamla prinsi eftir að hann varði vinskap sinn við barnaníðinginn Jeffrey Epstein í viðtali við bresku sjónvarpskonuna Emily Maitlis í þættinum Newsnight í breska ríkissjónvarpinu, BBC, í fyrradag.
Í Good Morning Britain, sem er morgunþáttur bresku sjónvarpsstöðvarinnar ITV, sagði Chuka Umunna, fyrrverandi þingmaður breska Verkamannaflokksins, prinsinn vera „fullkomna hneisu“. Hann sagði að prinsinn hefði dregið konungdæmið niður á lágt plan. Robert Buckland, dómsmálaráðherra Bretlands, sagði í samtali við bresku útvarpsstöðina BBC4 í dag að það væri ekki viðeigandi fyrir hann að tjá sig um málið.