Bóksala hefur aukist í Frakklandi frá því byrjað var að aflétta hömlum vegna kórónuveirunnar og nemur aukningin 230% á einni viku.
Samkvæmt rannsókn viðskiptaritsins Livres Hebdo var brjálað að gera í bókabúðum vikuna 11.-17. maí, fyrstu vikuna eftir að bókabúðir voru opnaðar að nýju í landinu. Svo virðist sem lesendur hafi verið orðnir ansi örvæntingarfullir eftir lesefni enda bókasöfn enn lokuð.
Samt sem áður er bóksalan um 60% minni en fyrir ári enda ekki búið að opna allar bókabúðir landsins. Bókaútgefendur segja stöðuna erfiða og tekjusamdrátt ársins 80%.
Fá ríki í Evrópu státa af jafn mörgum sjálfstætt reknum bókabúðum og Frakkland og gilda þar reglur varðandi lágmarksverð til að verja þær fyrir afsláttarkjörum netrisa eins og Amazon.
Menningarmálaráðherra Frakklands, Franck Rieseter, greindi frá því á föstudag að unnið sé að aðgerðapakka fyrir bókaútgefendur og bóksala.