41 hið minnsta hefur látist og 200 eru enn fastir um borð í lest í Taívan eftir að hún fór af sporinu í lestargöngum í nótt. Áætlað er að um 490 manns hafi verið um borð í lestinni.
Að sögn BBC lenti lestin á vinnuvél sem hafði runnið út á lestarteinana.
Lestin var á leiðinni frá Tapei til Taitung og voru farþegarnir á leiðinni í helgarfrí. Vegna þess hve margir voru í lestinni þurfu einhverjir að standa.
Sumum farþeganna, sem sátu aftast í lestinni, tókst að komast hjálparlaust út úr henni en 100 manns hefur nú verið bjargað af björgunarsveitarmönnum. Þeir reyna nú að komast inn í þá lestarvagna sem skemmdust hvað mest.
Í fréttum fjölmiðla á staðnum segir að lestarstjórinn sé meðal hinna látnu.
Forseti Taívan, Tsai Ing-wen, sagði í yfirlýsingu að það væri forgangsverkefni að bjarga þeim sem enn væru fastir.