Ökumaður pallbíls keyrði inn í hóp af fólki sem safnast hafði saman í gleðigöngu í Suður-Flórída í gær. Varð hann einum manni að bana og særði annan, samkvæmt upplýsingum frá yfirvöldum á staðnum.
Lögregla rannsakar nú hvort um viljaverk hafi verið að ræða, en atvikið átti sér stað í litlum bæ nærri Fort Lauterdale. Pallbíllinn hafði verið á meðal annarra bíla í göngunni þegar ökumaðurinn gaf í með þessum afleiðingum.
Bæjarstjóri Fort Lauderdale, Dean Trantalis, sagðist í gær telja að ökumaðurinn hefði viljandi keyrt á fólkið.
„Þetta var árás hryðjuverkamanns á LGBT-samfélagið,“ sagði bæjarstjórinn í gær.
Ökumaðurinn er í haldi lögreglu.