Erlent | AFP | 19.10.2022 | 7:52 | Uppfært 11:34

Rússar vilja rýma Kerson eins fljótt og auðið er

Kerson er eitt þeirra héraða sem Rússar innlimuðu ólöglega í síðasta mánuði. AFP/Juan Barreto

Rússnesk stjórnvöld hyggjast flytja á brott íbúa í borginni Kerson í suðurhluta Úkraínu.

Sergei Surovikin, sem fer fyrir aðgerðum rússnesku hersveitanna í Úkraínu, segir ástandið í borginni erfitt. Úkraínski herinn væri að skjóta niður innviði og húsnæði, en að rússneski herinn myndi tryggja öruggan brottflutning. BBC greinir frá.

Kírill Stremúsov, ríkisstjóri í Kerson sem Rússar skipuðu, segir ekki ólíklegt að her Úkraínu myndi í náinni framtíð gera árás á borgina.

Frétt af mbl.is

Rússar bjóða íbúum Kerson aðstoð við brottflutning

„Vinsamlegast takið orð mín alvarlega, ég er að tala um að rýma eins fljótt og auðið er,“ skrifaði Stremúsov á Telegram, og bætti við að íbúar við vesturbakka Dnípró væri í mestri hættu.

Hafa endurheimt svæði við borgina

Kerson var fyrsta stórborgin til að falla í hendur Rússa snemma í stríðinu og er Kerson-héraðið jafnframt eitt þeirra fjögurra héraða sem rússnesk stjórnvöld innlimuðu ólöglega í síðasta mánuði.

Hersveitir Úkraínumanna hafa nú endurheimt landsvæði í grennd við borgina á síðustu vikum.