Erlent | AFP | 21.9.2023 | 17:10

Erfiður vetur blasir við Úkraínumönnum

Volodimír Selenskí Úkraínuforseti er nú staddur í Bandaríkjunum þar sem hann óskar eftir auknum stuðningi. AFP

Úkraínsk stjórnvöld lýsa áhyggjum af erfiðum vetri, sem blasi við í kjölfar þess að þrír létu lífið í rússneskri flugskeytahríð í sunnanverðri Úkraínu og fleiri slösuðust víða í landinu. Árásin olli einnig skemmdum á orkuinnviðum landsins.

Úkraína býr sig nú undir sinn þriðja vetur í stríðinu við Rússland, sem hófst með innrás Rússa fyrir 19 mánuðum. Volodimír Selenskí Úkraínuforseti er nú staddur í Washington, til þess að óska eftir auknum stuðningi Bandaríkjanna.

„Flest flugskeyti voru skotin niður. En bara meirihlutinn. Ekki öll,“ sagði Selenskí í ávarpi til bandamanna, þar sem hann óskaði eftir fleiri loftvarnarvopnum.

Árásin átti sér stað stuttu eftir að Pólland tilkynnti að landið myndi uppfylla þegar undirritaða samninga um vopnaflutninga, aðeins degi eftir að stjórnvöld í Varsjá tilkynntu að þau myndu hætta að senda vopn til Úkraínu.

Frétt af mbl.is

Pólland mun uppfylla undirritaða vopnasamninga

Frétt af mbl.is

Pólland hættir að senda vopn til Úkraínu

Flugskeyti lentu víðsvegar um landið

Rússar skutu á svæði víða um Úkraínu og skeytin lentu á borgumum Rívne í vestanverðri Úkraínu, Kerson í sunnanverðu landinu – þar sem þrír létust –, Kænugarði og ýmsum borgum í miðju og norðaustanverðu landinu.

Stjórnvöld í Kænugarði hafa einnig sagt að rafmagni hafi slegið út víða í landinu, eða í tæplega 400 borgum. Telja stjórnvöld að óvinir þeirra að austan hafi verið að miða á orkuinnviði landsins en þó sé of snemmt að segja til um hvort árásin sé hluti af nýrri hernaðaráætlun Rússa.

„Það eru erfiðir mánuðir framundan. Rússland mun ráðast á orkuinnviði og fleiri mikilvæga innviði landsins,“ sagði Óleksiy Kúleba, yfirmaður stjórnarskrifstofu Úkraínuforseta við blaðamenn í dag.