Íbúum Reykjavíkur gefst kostur á að velja milli tveggja kosta í atkvæðagreiðslu sem fram fer í dag um framtíðarnýtingu Vatnsmýrarinnar. Spurt verður: "Vilt þú að flugvöllur verði í Vatnsmýri eftir árið 2016 eða vilt þú að flugvöllurinn fari úr Vatnsmýri eftir árið 2016?" Svarmöguleikar eru þrír. Í fyrsta lagi að flugvöllur verði í Vatnsmýri eftir árið 2016, í öðru lagi að flugvöllurinn fari úr Vatnsmýri eftir árið 2016 og í þriðja lagi er hægt að skila auðu. Utankjörfundaratkvæðagreiðslu lauk síðdegis í gær í ráðhúsinu og kusu þar um 2.700 manns.
Á kjörskrá eru 81.282 íbúar Reykjavíkur en meginskilyrði kosningaréttar eru að vera íslenskur ríkisborgari, hafa átt lögheimili í Reykjavík 24. febrúar 2001 og hafa náð 18 ára aldri á kjördag. Enn fremur eiga kosningarétt danskir, finnskir, norskir og sænskir ríkisborgarar sem átt hafa lögheimili hér á landi í þrjú ár samfellt fyrir kjördag, enda fullnægi þeir að öðru leyti ofangreindum skilyrðum.
Kosið verður á tölvu en kosningin krefst ekki sérstakrar tölvukunnáttu hjá kjósendum, að sögn Gunnars, en leiðbeiningar fylgja hér á skýringarmynd. Sérstakur búnaður verður fyrir fatlaða og verður sérbúin kosningatölva fyrir blinda og sjónskerta í ráðhúsinu.
Þetta stór atkvæðagreiðsla hefur ekki áður farið fram með rafrænum hætti hér á landi, ef kosningar á síðasta ASÍ-þingi eru undanskildar. Í grein í Morgunblaðinu í gær var bent á öryggisþátt rafrænna kosninga og þá staðreynd að a.m.k. einn tæknimaður hefði aðgang að öllum þáttum kosningakerfisins og gæti þess vegna breytt niðurstöðum kosninganna.
"Þessi mannlegi brestur getur alltaf verið fyrir hendi hjá yfirkjörstjórn eða tölvumönnum.
Við höfum hugsað út í þetta og brugðist við með þessum hætti, þannig að menn heiti trúnaði og heilindum í sínum störfum," sagði Gunnar.