Innlent | mbl | 15.11.2007 | 7:03 | Uppfært 10:48

Bifreið gjöreyðilagðist er hún þeyttist á bensínstöð

Bifreiðin gjöreyðilagðist eins og sést á þessari mynd sem var tekin í nótt. mbl.is/Frikki

Mjög harður árekstur varð við bensínstöð Skeljungs við gatnamót Kleppsvegar og Sæbrautar í Reykjavík um kl. 1:20 í nótt. Að sögn lögreglu missti ökumaður stjórn á bifreið er hann beygði inn Kleppsveg af Sæbraut. Bifreiðin var á mikilli ferð og endaði hún að hluta inni í bensínstöðinni sem skemmdist mikið. Bifreiðin er gjörónýt. Tveir voru fluttir á sjúkrahús en þeir eru ekki taldir vera alvarlega slasaðir. Ökumaðurinn er grunaður um að hafa ekið undir áhrifum áfengis og vímuefna.

Að sögn lögreglu ók bifreiðin niður umferðarskilti, rakst á stólpa og hringsnerist á milli bensíndælanna og afgreiðslunnar. Hún hafnaði að endingu með afturendann að hluta inni í afgreiðslu bensínstöðvarinnar. Miklar skemmdir urðu á bensínstöðinni en engin var þar inni þegar slysið varð. Lögregla segir mikla mildi að ekki hafi orðið slys á öðrum vegfarendum.

Slökkvilið höfuðborgarsvæðisins sendi tækjabíl auk nokkurra sjúkrabíla á staðinn. Hún var í um þrjá tíma á vettvangi við hreinsunarstörf. Að sögn SHS var aðkoman mjög ljót og minnti hún meira á flugslys heldur en umferðarslys.

Á meðan lögreglumenn og slökkviliðsmenn voru að störfum á vettvangi í nótt kom önnur bifreið og ók inn á svæðið sem búið var að girða af. Lögreglan segir ökumanninn hafa ekið á ofsahraða og mildi að enginn hafi orðið fyrir henni. Lögreglumenn veittu bifreiðinni eftirför og var ökumaðurinn stöðvaður stuttu síðar. Að sögn lögreglu var ökumaðurinn ölvaður og einnig undir áhrifum fíkniefna.