„Öll verkin eru komin á Kjarvalsstaði og ekkert skemmdist af völdum reyks eða vatns. Smá skemmd er á einu þeirra vegna flutninganna en það verður auðvelt að gera við það,“ segir Hafþór Yngvason safnstjóri Listasafns Reykjavíkur um verkin sem bjargað var í kvöld vegna brunans í Höfða.
Um 25 málverk var að ræða sem eru í eigu Listasafns Reykjavíkur. M.a. eftir Kjarval, Erró, Louisu Matthíasdóttur, Eggert Pétursson, Helga Þorgils, Svavar Gunnarsson og fleiri. „Þetta var mjög glæsilegt safn sem var til sýnis í Höfða en þau eru nú öll komin til geymslu hér á Kjarvalsstöðum svo þetta blessaðist, Guði sé lof,“ segir Hafþór. Hann segir ómögulegt að segja til um heildarverðmæti verkanna en að um ómetanlegar þjóðargersemar sé að ræða.