Ríkustu fjölskyldurnar skera sig úr hópnum

Af um 182 þúsund fjölskyldum töldu rúmlega 79 þús. fjölskyldur ...
Af um 182 þúsund fjölskyldum töldu rúmlega 79 þús. fjölskyldur ekki fram neinar skuldir en töldu fram eignir upp á 845 milljarða. Golli / Kjartan Þorbjörnsson
Fjölskyldur  sem eiga meira en 150 milljónir eiga samtals 468 milljarða í framtaldar eignir. Það er 1.281 fjölskylda sem á þessar miklu eignir. Þetta eru 0,8% af öllum fjölskyldum í landinu, en hópurinn á 12,8% af öllum eignum. Þetta kemur fram í Tíund, fréttablaði ríkisskattstjóra, en greinina ritar Páll Kolbeins.

Niðurstaðan í grein Páls er að þó að margar fjölskyldur glími við fjárhagserfiðleika vegna þeirra áfalla sem dunið hafa yfir í efnahagslífinu gildi það alls ekki um alla. Margir séu langt frá því að vera á flæðiskeri staddir.

79.149 fjölskyldur telja ekki fram neinar skuldir, þar af eru 67.433 einhleypingar og 11.706 hjón. Eignir þessa hóps námu 845 milljörðum. Um 60% fjölskyldna skulda innan við fimm milljónir eða ekki neitt.

37.320 fjölskyldur skulda meira en þær eiga

Þó að staðan sé góð hjá meirihluta allra fjölskyldna í landinu gildir það ekki um alla. 37.320 fjölskyldur skulda meira en þær eiga. Sá fyrirvari er við þessa tölu að í einhverjum tilvikum kunna að vera eignir sem ekki eru skráðar á markaðsvirði. Hópurinn sem á minnst er jafnframt hópurinn sem skuldar hlutfallslega mest. 76.344 einstaklingar töldu fram eignir sem voru metnar á innan við 10 milljónir. Hann átti samtals 115 milljarða en skuldaði 108 milljarða. Gera má ráð fyrir að í þessum hópi séu margir sem hafi tekið bílalán og lánin hafa hækkað en eignirnar fallið í verði.

Þeir sem hafa keypt fasteignir á síðustu árum eru í sömu stöðu. Þessi hópur hefur ekki notið hækkunar á fasteignaverði, en skuldirnar hafa hækkað ár frá ári. Þeir sem eiga á bilinu 5 til 10 milljónir í fasteign skulda 80,1% af matsverði fasteignarinnar. Þetta hlutfall lækkar eftir því sem eignarhlutur í fasteigninni hækkar.

Í grein Páls í blaðinu Tíund kemur fram að stór hópur landsmanna greiði meira en þriðjung brúttótekna sinna í vexti og afborganir af lánum. Hér er um að ræða 9.232 einhleypinga og hjón en sumir þessara framteljenda, 225 hjón og 972 einhleypingar eða alls 1.197 heimili, töldu fram hærri vaxtagreiðslur en sem nam framtöldum brúttótekjum síðasta árs.

Flestar fjölskyldur töldu fram eignir sem metnar voru á bilinu frá 10 til 40 milljónir króna í árslok 2008 og af þessum hópi áttu flestar á bilinu 15 til 25 milljónir króna. Af 181.755 fjölskyldum í landinu greiddu 82.039 enga vexti á síðasta ári.

Skuldir jukust

Frá 2000 til 2008 jukust skuldir einstaklinga úr 415 milljörðum í 1.683 milljarða. Þetta er fjórföldun skulda á átta árum. Skuldirnar jukust mest á síðasta ári eða um 24,9%. Á sama tíma jukust eignir aðeins um 8,2% þrátt fyrir að ýmislegt bendi til þess að þá hafi komið inn á skattframtöl mikið af bankainnistæðum sem áður voru vantaldar. Eignir einstaklinga hafa aukist mikið á síðustu árum og nema nú 3.657 milljörðum.

Hér er hægt að lesa Tíundina í heild

Nánar um málið
í Morgunblaðinu
Áskrifendur:
Nánar um málið
í Morgunblaðinu
Áskrifendur:
Kauptu vikupassa

Lestu meira með vikupassa!

Fáðu þér vikupassa fyrir 1.790 kr. og þú færð aðgang að öllu efni úr blaði dagsins í dag og næstu 6 daga.

Kaupa vikupassa

Aðrar áskriftarleiðir »