Blaðamannafundur á Bessastöðum

Ólafur Ragnar Grímsson, forseti Íslands, hefur boðað blaðamenn á sinn …
Ólafur Ragnar Grímsson, forseti Íslands, hefur boðað blaðamenn á sinn fund á Bessastöðum í dag. mbl.is

Ólafur Ragnar Grímsson, forseti Íslands, boðaði rétt í þessu til blaðamannafundar á Bessastöðum klukkan 15 í dag og mun þar, skv. heimildum mbl.is, tilkynna niðurstöðu sína í Icesave málinu.

Alþingi samþykkti á miðvikudag lög um að fjármálaráðherra fái heimild til að staðfesta samninga, sem gerðir voru í desember við Breta og Hollendinga um Icesave-málið. Forsetinn fékk frumvarpið til staðfestingar þá um kvöldið.

Aðstandendur vefsíðunnar kjosum.is afhentu forseta Íslands á föstudag lista með nöfnum 37.488 Íslendinga sem skrifað höfðu undir yfirlýsingu þar sem forsetinn er hvattur til þess að synja lögunum staðfestingar, og vísa þeim þannig til þjóðaratkvæðagreiðslu. 

Í morgun höfðu rúmlega 42.000 manns skrifað undir yfirlýsinguna á vefnum. 

Ólafur Ragnar lýsti því yfir á föstudag að málið væri erfitt og flókið. Alþingi hafi fjallað um málið vikum og mánuðum saman, og því væri eðlilegt að hann taki sér nokkurra daga umþóttunartíma. 

mbl.is