Heiða Kristín Helgadóttir, varaþingmaður Bjartrar framtíðar og fyrrverandi stjórnarformaður flokksins, segist vera reiðubúin að taka við formennsku innan hans af Guðmundi Steingrímssyni alþingismanni sé vilji fyrir því.
Þetta kom fram í máli hennar í útvarpsþættinum Vikulokum á Rás 1 í morgun. Guðmundur hefði fengið næg tækifæri til þess að sanna sig. Björt framtíð næði ekki inn manni á Alþingi samkvæmt nýjustu skoðanakönnun MMR. Aðspurð sagðist hún vel treysta sér til að taka við flokknum.
Komið hefur fram áður að Heiða Kristín væri ekki reiðubúin að taka sæti á Alþingi í stað Bjartrar Ólafsdóttur, þingmanns Bjartrar framtíðar, sem er á leið í fæðingarorlof. Hún sagðist hins vegar reiðubúin að endurskoða þá ákvörðun ef Guðmundur viki sem formaður.