Hæstiréttur dæmdi karlmann í fimm mánaða skilorðsbundið fangelsi og til að greiða hálfa milljóna króna í miskabætur vegna líkamsárásar á fyrrverandi sambýliskonu sína. Maðurinn barði hana meðal annars í andlitið, sparkaði í hana og hrinti þannig að hún rifbeinsbrotnaði og hlaut önnur meiðsli.
Í dómnum kemur fram að í september árið 2013 hafi maðurinn slegið konuna hnefahöggi í andlitið, hent henni utan í svefnherbergisskáp, hrint henni svo hún féll og lenti með öxlina á kommóðu, tekið í hendi hennar og sparkað, íklæddur skóm, í læri, kálfa og síðu hennar, tekið hana hálstaki með báðum höndum og ýtt á bringu hennar þannig að hún féll aftur fyrir sig og lenti á glerborði, allt með þeim afleiðingum að hún hlaut rifbeinsbrot, sár og mar á olnboga og mar á öxl, læri og hné.
Hann var sakfelldur fyrir brotin í Héraðsdómi Reykjaness fyrir utan að ekki taldist sannað að hann hefði tekið konuna hálstaki. Var hann dæmdur í fimm mánaða skilorðsbundið fangelsi og til þess að greiða konunni hálfa milljón króna í bætur.
Ríkissaksóknari áfrýjaði málinu og krafðist þyngri refsingar en Hæstiréttur staðfesti dóminn. Maðurinn þarf til viðbótar að greiða allan áfrýjunarkostnað málsins sem nemur rúmum 658 þúsund krónum.