Breyta húsnæði bæjarskrifstofa Kópavogs

Á fundi bæjarstjórnar Kópavogs í kvöld lagði Ármann Kr. Ólafsson bæjarstjóri Kópavogs fram tillögu fyrir hönd meirihluta Sjálfstæðisflokks og Bjartrar framtíðar að farið verði í breytingar á húsnæði bæjarskrifstofa Kópavogs sem rúmast innan gerðar fjárhagsáætlunar. Þetta kemur fram í fréttatilkynningu frá Kópavogsbæ.

Tillagan var samþykkt með 9 atkvæðum af 11 í bæjarstjórn Kópavogs.

Undanfarna mánuði hefur bæjarstjórn og starfshópur á hennar vegum skoðað kosti og galla þess að gera við núverandi húsnæði eða finna stjórnsýslu bæjarins annan stað. Fyrir fundi bæjarstjórnar lá tillaga um að kjósa milli þeirra kosta sem starfshópurinn lagði til, viðgerð annars vegar og kaup á nýju húsnæði hins vegar.

Frávísun á þá tillögu og þar með á viðbótartillögu oddvita Samfylkingarinnar um að byggja nýjar bæjarskrifstofur ofan á bílageymslu við Molann gegnt Salnum, var samþykkt af meirihluta bæjarstjórnar.

• Blogga um frétt