Ekki hefur verið jafn mikið af fiski í sjónum við Ísland í áratugi og nú, að sögn Þorsteins Sigurðssonar, sviðsstjóra nytjastofnasviðs Hafrannsóknastofnunar. Metfiskirí er nú víða við Suður- og Vesturland.
„Þetta er í samræmi við þróunina í þorskstofninum. Það er alls staðar góð veiði þar sem menn eru að róa,“ segir Þorsteinn í umfjöllun um fiskiríið í Morgunblaðinu í dag.
Hann minnti á að í skýrslu Hafrannsóknastofnunar í fyrra hefði komið fram að viðmiðunarstofninn hefði þá verið metinn stærri en hann hafði verið undanfarna þrjá áratugi. Þorsteinn sagði að aukningin í þorskstofninum kæmi fram í veiðinni nú.