Í nótt og í dag hafa björgunarsveitir Slysavarnafélagsins Landsbjargar á Dalvík, Hólmavík, Mývatni og Seyðisfirði verið kallaðar út vegna ökumanna sem fest hafa bifreiðar sínar. Um tvöleytið fóru björgunarsveitarmenn frá Mývatni á leið til aðstoðar á Hólasandi þar sem hátt í 10 bifreiðar eru fastar.
„Rétt er að benda á að víða er þungfært og einhverjir vegir lokaðir. Bent er á að kanna aðstæður vel áður en lagt er í hann þar sem víða á landinu verða erfiðar ferða aðstæður í dag og á morgun,“ segir í tilkynningu frá Slysavarnafélaginu Landsbjörg.
Á Norðurlandi vestra eru sums staðar hálkublettir en þó er hálka og skafrenningur á Þverárfjalli og Siglufjarðarvegi. Það er hálka og skafrenningur á Öxnadalsheiði en við Eyjafjörð og þar fyrir austan er vetrarfærð, hálka eða snjóþekja og skafrenningur víða, sums staðar jafnvel þæfingur. Ófært er yfir Mývatns- og Möðrudalsöræfi.
Hálka eða snjóþekja er víða á Austurlandi, éljagangur og skafrenningur. Slæmt veður er á Fjarðarheiði og heiðin ófær. Breiðdalsheiði er einnig ófær.
Vegir eru að heita má auðir um allt sunnanvert landið.
Á Vesturlandi eru vegir greiðfærir á láglendi en hálkublettir á fjallvegum, raunar hálka á Fróðárheiði.
Það er snjóþekja, hálka eða hálkublettir á Vestfjörðum og víða skafrenningur. Ófært er norður í Árneshrepp.