Innlent | mbl | 27.6.2016 | 22:18 | Uppfært 22:34

Reyna að koma sem flestum til Parísar

Íslensku landsliðsmennirnir fagna sigri í kvöld. AFP

„Nú fer vinna af stað við það að reyna að koma sem flestum sem vilja til Parísar um helgina,“ segir Guðjón Arngrímsson, upplýsingafulltrúi Icelandair, í samtali við mbl.is.

Með sigri sínum á Englandi í kvöld komst íslenska landsliðið í átta liða úrslit Evrópumótsins í knattspyrnu. Mun liðið leika gegn gestgjöfunum, Frökkum, sunnudagskvöldið 3. júlí á þjóðarleikvangi Frakka, Stade de France.

Guðjón segir að úrslitin í kvöld hafi ekki verið eitthvað sem þeir hjá Icelandair hefðu almennt reiknað með, eins og gefur að skilja. Nú verði engu að síður brugðist við stöðunni og þeim mikla áhuga sem verður á flugmiðum til frönsku höfuðborgarinnar næstu helgi.

„Við erum með þrjár flugferðir á dag en ef að líkum lætur verður það fljótt að fyllast.

Þá er spurning hvaða aðrar leiðir bjóðast. Það er auðvitað þannig að það er hægt að komast til Parísar í gegnum London, Brussel, Amsterdam, Kaupmannahöfn og ýmsar aðrar borgir.

En síðan reynum við að finna flugvélar í beint flug, en það er ekki alveg einfalt á þessum árstíma að finna lausar flugvélar,“ bendir Guðjón á.

Jafnframt fari það eftir því hvernig fólki muni ganga að afla sér miða á leikinn sjálfan.

Stade de France tekur rúmlega 81 þúsund áhorfendur, en Allianz Riviera-leikvangurinn í Nice, sem leikið var á í kvöld, tekur einungis rúmlega 35 þúsund. Íslendingar ættu því að eiga betri möguleika á að næla sér í miða á leikinn á sunnudag, en þó ber að hafa í huga að íslensku strákarnir munu etja kappi við gestgjafana og eftirspurnin eftir miðum því væntanlega gríðarleg.