Sæheimar í Vestmannaeyjum hafa vigtað 3.310 lundapysjur það sem af er hausti og vantar nú einungis rétt yfir 500 pysjur til að slá met í sögu pysjueftirlitsins sem náðist árið 2015 og er 3.827. Erlendir fjölmiðlar sýna pysjunum mikinn áhuga.
„Þetta er aðeins að minnka en það er hellingur að gerast ennþá. Ég reikna með að þetta gæti staðið fram í miðjan október,“ segir Erpur Snær Hansen hjá Náttúrufræðistofu Suðurlands. Hann segir að varpið hafi byrjað seint, þriðjungur þess hafi verið eftir lok júlí, og skýrist það að mestu leyti af síðbúnum vorblóma.
Í Vestmannaeyjum er hefð fyrir því að börn komi pysjunum til bjargar, setji þær í pappakassa og sleppi þeim síðan í sjóinn næsta dag. Pysjurnar, sem hafa ekki fyllilega náð taki á fluginu, eiga á hættu að verða köttum, bílum eða mönnum að bráð eða deyja úr hungri í bænum.
Pysjunum hefur fjölgað síðustu þrjú ár. Þær voru 2.100 á sama tíma fyrir tveimur árum og telur Erpur að fjöldinn geti farið upp yfir 4.000. Ofan á það hafa pysjurnar aldrei verið þyngri en þyngd getur skipt töluverðu máli fyrir lífslíkur.
„Þær eru að þyngjast og það eru góðar fréttir vegna þess að það milli léttrar pysju og þungrar getur verið fimmfaldur munur á lífslíkum.“
Erlendir fjölmiðlar hafa sýnt pysjunum mikinn áhuga í haust. Tökulið frá Bandarísku sjónvarpsstöðinni CBS kom til Eyja fyrr í vikunni og von er á breska ríkisútvarpinu BBC á næstu dögum. „Það er allt í yfirsnúningi,“ segir Erpur Snær.