Guðni Th. Jóhannesson, forseti Íslands, sendi í dag dönsku konungsfjölskyldunni samúðarkveðjur sínar og íslensku þjóðarinnar vegna fráfalls Hinriks prins.
Þetta kemur fram í tilkynningu.
Í kveðju sinni minntist forseti góðra kynna þeirra forsetahjóna af Hinrik í opinberri heimsókn til Danmerkur í byrjun síðasta árs.
Hann hafi verið áhugasamur, elskulegur og lifandi í viðkynningu, góður gestgjafi sem þekkti vel sögu þjóðanna og menningu og sýndi málefnum Íslands ríkan áhuga. Með Hinrik prins sé genginn mætur maður sem rækt hafi skyldur sínar í þágu dönsku þjóðarinnar af metnaði og alúð.