Norski dráttarbáturinn sem verið er að dæla upp úr í Faxagarði heitir FFS Amaranth og hefur það verkefni að draga togara frá Grænlandi.
Báturinn var rétt ókominn til hafnar þegar hann óskaði eftir aðstoð Landhelgisgæslunnar klukkan 13.35 í dag. Skipstjórinn hafði áhyggjur af því að það myndi drepast á vélunum áður en hann kæmist til hafnar en það gerðist ekki.
Ellefu mínútum síðar, eða klukkan 13.46, hafði báturinn lagst við höfn á eigin vélarafli.
Fimm manns voru í áhöfninni, allt Norðmenn.
Björgunarsveitin Ársæll hefur aðstoðað slökkviliðið á höfuðborgarsvæðinu á vettvangi. Slökkviliðið er enn að dæla upp úr bátnum og svo virðist sem ekkert neyðarástand ríki, að sögn Landhelgisgæslunnar.
Sjór komst í vélarrúmið og líklegt er að lekinn sem kom upp tengist sjókælingu bátsins.
Málið er núna í höndum lögreglunnar á höfuðborgarsvæðinu.