Umhverfisstofnun hefur veitt Íslenska kalkþörungafélaginu nýtt starfsleyfi sem gildir til ársins 2034. Með leyfinu verður félaginu gert kleift að auka framleiðslu sína um 35 þúsund tonn, úr 50 þúsund tonnum í 85 þúsund tonn.
Kalkþörungafélagið kynnti áform sín um framleiðsluaukningu kalks á Bíldudal í júní árið 2016 og óskaði umsagna frá hagsmunaaðilum. Meðal þeirra eru Ísafjarðarbær, Vesturbyggð, Hafrannsóknastofnun, Heilbrigðiseftirlit Vestfjarða, Orkustofnun og Umhverfisstofnun. Skipulagsstofnun mat það sem svo að fyrirhuguð framleiðsluaukning hefði ólíklega í för með sér umtalsverð umhverfisáhrif og yrði því ekki háð mati á umhverfisáhrifum.
Fyrirtækið lét einnig útbúa nýtt hljóðstigskort fyrir áhrifasvæði verksmiðjunnar og endurskoðaði mengunarmælingar og vöktunaráætlun í samstarfi við viðeigandi stofnanir. Í starfsleyfi Umhverfisstofnunar segir að leyfið taki ekki efnislegum breytingum utan orðalagsbreytingar um mengunarmælingar sem hafi verið endurskoðaðar til að bæta gæði þeirra.