Tveimur mönnum var bjargað úr báti sem var í vanda staddur við Ingveldastarðahólma í Skagafirði. Báturinn er sokkinn.
Björgunarsveitin Skagfirðingasveit var kölluð á vettvang.
Svavar Atli Birgisson, slökkviliðsstjóri hjá Brunavörnum Skagafjarðar, staðfesti að einn sjúkraflutningabíll hafi verið kallaður út.
Bátur frá björgunarsveit var einnig kallaður á vettvang.
Landhelgisgæslunni barst neyðarboð um atvikið klukkan 20.39. Skipverjunum var bjargað laust fyrir klukkan 21.30.
Svavar staðfesti við mbl.is klukkan 21:42 að báðir einstaklingarnir sem voru um borð séu komnir í sjúkrabíl og eru á leið á sjúkrahúsið á Sauðarkróki til skoðunar. Hann segir þá kalda en að öðru leiti virðast þeir ekki illa haldnir.
Fréttin hefur verið uppfærð.
Í tilkynningu frá Landhelgisgæslunni kemur fram að eftir að tilkynning barst um að báturinn væri í vanda hafi við nánari eftirgrennslan komið í ljós að hann hafði farið á hliðina.
TF-GNÁ, þyrla Gæslunnar, var þegar í stað kölluð út.
Farþegabáturinn Súlan var sömuleiðis sendur á staðinn frá Hofsósi ásamt björgunarsveitarmönnum.