Bæjarráð Árborgar samþykkti í morgun að halda íbúakosningu um nýjan miðbæ á Selfossi og fer kosningin fram 18. ágúst.
Fyrirhugað er að reisa nýja miðbæinn á svæði austan við Ölfusárbrúna, en það er Sigtún þróunarfélag sem stendur á bak við verkefnið. Á að endurbyggja sögufræg hús sem stóðu áður víðs vegar um landið, en meðal annars á þessi nýi miðbær að auka aðdráttarafl bæjarins.
Skiptar skoðanir hafa hins vegar verið um ágæti uppbyggingarinnar, bæði vegna staðsetningar miðbæjarins og útlits.