Silja Dögg Gunnarsdóttir, þingmaður Framsóknarflokksins, segist aldrei hafa orðið vör við óþarfa eyðslu af hálfu þingsins í störfum sínum í Norðurlandaráði en hún er formaður Íslandsdeildar ráðsins og hefur einnig átt sæti í utanríkismálanefnd í fimm ár.
Þar vísaði hún, undir liðnum störf þingsins, í ræðu Guðmundar Inga Kristinssonar, þingmanns Flokks fólksins, á Alþingi í gær vegna ferðar sjö þingmanna og þriggja aðstoðarmanna á fund velferðarnefndar Norðurlandaráðs á Nuuk á Grænlandi.
Silja Dögg sagði að þingmenn séu ekki látnir gista á fínustu hótelunum, sagði fundarstaðina vel valda og að reynt væri að skipuleggja allt á sem hagkvæmastan hátt.
Hún sagði mörg þeirra réttinda sem séu sameiginleg á Norðurlöndunum eigi rætur sínar að rekja til Norðurlandaráðs og sagði Norðurlandaþjóðirnar deila sameiginlegri sýn á grunngildi eins og mikilvægi mannréttinda, lýðræðis og réttarríkis.
„Ég tel þörf á því að þingmenn ræði meira um norrænt samstarf. Þannig eyðum við tortryggni þeirra sem telja að slíkt samstarf sé aðeins peningasóun.“
Guðmundur Ingi steig síðar í pontu og sagðist ekki hafa verið að gagnrýna fólkið sem starfi í Norðurlandaráði heldur skipulagið við ferðirnar. „Ég tel að ef ég hefði vitað nákvæmlega um þessa ferð fyrirfram hefði ég aldrei farið í hana,“ sagði hann og spurði hvers vegna hann hafi verið í tvo daga í Nuuq að skoða sig um áður en ráðstefnan hófst, ef skipulagið hafi verið svona gott. „Þarna er hótelkostnaður sem var algjör óþarfi.“
Hann kvaðst hafa trú á því að Silja Dögg sé að gera góða hluti í stjórninni en að breyta þurfi óþörfum kostnaði stjórnvalda. Nefndi hann sem dæmi þegar fólk er sent til Svíþjóðar í mjaðmaaðgerðir og hátíðarhöldin á Þingvöllum í sumar vegna fullveldisafmælis Íslands.
Nefndi hann að 22 milljónir hafi farið í ljós á hátíðinni á Þingvöllum og spurði hvort verkið hafi verið boðið út. Einnig nefndi hann að 40 milljónir hafi farið í smíðakostnað. „Hvað varð um allt þetta timbur?“