Fyrirtaka hefur verið boðuð í Héraðsdómi Reykjaness næstkomandi fimmtudag í máli bandaríska flugvélaleigufyrirtækisins ALC gegn Isavia.
Eins og mbl.is greindi frá í gær lagði ALC fram aðra aðfararbeiðni gegn Isavia fyrir héraðsdómi í gær þar sem þess var krafist að farþegaþota sem kyrrsett hefur verið á Keflavíkurflugvelli verði látin laus, þar sem búið sé að greiða skuldir hennar í samræmi við úrskurð héraðsdóms frá því í síðustu viku.
ALC lagði fyrst fram aðfararbeiðni gegn Isavia þann 20. apríl þar sem þess var krafist að Isavia léti af hendi farþegaþotuna TF-GPA sem kyrrsett var við gjaldþrot WOW air þann 28. mars. Úrskurður héraðsdóms féll á fimmtudag, þar sem Isavia var sagt mega aftra brottför vélarinnar vegna þeirra gjalda sem tengjast vélinni sjálfri. Það félli ekki yfir aðrar skuldir WOW air við Isavia, en kyrrsetning vélarinnar átti að vera trygging fyrir um tveggja milljarða skuld WOW air við Isavia.
Isavia áfrýjaði því máli til Landsréttar og hefur boðað að það muni mótmæla nýrri aðfararbeiðni á þeim grundvelli að mál um sama atriði sé nú til meðferðar hjá æðri dómstól.