Karlmaður sem var á mánudag úrskurðaður í sex mánaða nálgunarbann vegna rökstudds gruns um að hafa beitt fyrrverandi sambýliskonu sína líkamlegu, andlegu og kynferðislegu ofbeldi, hefur verið úrskurðaður í gæsluvarðhald í eina viku.
Landsréttur staðfesti í gær úrskurð Héraðsdóms Reykjavíkur um gæsluvaðrhald á grundvelli rannsóknarhagsmuna. Í úrskurðinum, sem RÚV greinir frá, kemur fram að maðurinn hafi neitað að afhenda aðgangsorð að síma sínum. Einnig er farið fram á varðhald yfir manninum þar sem lögregla telur hann geta spillt rannsóknarhagsmunum.
Sambýliskona mannsins lagði fram kæru vegna heimilisofbeldis í janúar. Í úrskurði Héraðsdóms Reykjavíkur kemur fram að þegar konan sagði við manninn að hann gæti ekki dvalið lengur á heimilinu hafi hann tryllst, sparkað í hana og hellt yfir hana mjólk. Þá sló hann son þeirra utan undir þegar hann reyndi að stöðva föður sinn. Í febrúar lagði konan fram kæru vegna kynferðisbrots þar sem hún lýsir því að maðurinn hafi beitt hana miklu andlegu ofbeldi síðustu fjögur ár.
Rannsókn lögreglu leiddi meðal annars í ljós að frá því í febrúar voru 121 tölvupóstar sendir sem innihéldu nektarmyndir af konunni á 235 mismunandi póstföng. Afrit af póstunum voru send á konuna. Nálgunarbannið veitir konunni ekki vörn gegn dreifingu kynlífsmynda, að því er segir í úrskurðinum, en brotið felur samt sem áður í sér „grófa atlögu að friðhelgi og æru þeirra sem fyrir verða“.
Í úrskurði héraðsdóms um nálgunarbannið, sem Landsréttur hefur staðfest, kemur fram að samkvæmt rannsóknargögnum er rökstuddur grunur um að konunni stafi ógn af manninum og að hún hafi sætt ofbeldi og ógnunum af hans hálfu og hann valdið henni mikilli vanlíðan.
Í úrskurði héraðsdóms frá því í gær kemur fram að rannsókn málsins sé langt komin en enn eigi eftir að rannsaka svokallaðar sýndartölvur sem lögregla hefur lagt hald á. Þar sem maðurinn neitaði að gefa upp aðgangsorðs að símanum var hann sendur erlendis til rannsóknar og beðið er eftir niðurstöðum.
Lögregla telur að maðurinn geti torveldar rannsókn málsins gangi hann laus, til dæmis með því að eyða rafrænum sönnunargögnum, og því féllst Landsréttur á gæsluvarðhald.