„Ég er nú bara að hlaupa núna,“ sagði Hörður Halldórsson þegar mbl.is hringdi í hann. Hörður hleypur nú um helgina yfir hálendi Íslands með hópi slökkviliðs- og björgunarsveitarmanna, 340 kílómetra leið, til stuðnings Hollvinasamtökum Sjúkrahússins á Akureyri.
Hópurinn átti um 30 km eftir í Árnes þegar mbl.is ræddi við Hörð. Þar munu menn hvíla sig áður en 42 km lokaspretturinn til Selfoss verður tekinn.
Að sögn Harðar, sem vílaði ekki fyrir sér að ræða við blaðamann á hlaupunum, hefur þeim gengið mjög vel. „Þetta var erfiðast þar sem við vorum að fara yfir fjöllin,“ segir hann. Flestir hafi hins vegar haft mest gaman af því að hlaupa í gegnum nóttina, en hópurinn lagði af stað frá Akureyri á föstudagsmorgun.
Sexmenningarnir sem hlaupa fyrir verkefnið Gengið af göflunum hafa hlaupið eins konar boðhlaup yfir hálendið. „Við vorum að hlaupa svona 10 km í einu í fyrstu, en nú miðum við við fimm kílómetra og ef menn geta hlaupið lengra þá gera þeir það,“ segir Hörður og kveður hljóðið í sexmenningunum vera gott. „Þrátt fyrir þreytu og lausar táneglur“, bætir hann við en félagarnir gera ráð fyrir að koma inn á Selfoss um ellefuleytið í fyrramálið.
Að þessu sinni er safnað fyrir hitakassa á barnadeild Sjúkrahússins á Akureyri. Í hitteðfyrra söfnuðust 1,2 milljónir króna fyrir ferðafóstru sem er gjörgæslueining fyrir nýbura og fyrirbura. Þá gekk hópurinn m.a. Eyjafjarðarhringinn, sem er 30 kílómetrar, í fullum slökkviliðsskrúða.
Hægt er að fylgjast með hlaupinu á Snapchat, Instagram og Facebook.
Kennitala hollvinasamtakanna er 640216-0500 og reikningsnúmer 0565-26-10321.