Karlmaður beraði á sér kynfærin í Stakkahlíð

Maðurinn gekk inn í kennslustofu í Kennaraháskóla Íslands við Stakkahlíð.
Maðurinn gekk inn í kennslustofu í Kennaraháskóla Íslands við Stakkahlíð. mbl.is/Árni Sæberg

Karlmaður beraði á sér kynfærin í kennslustofu í Stakkahlíð í Háskóla Íslands um hádegið í dag. Óskað var eftir aðstoð lögreglu og komu fimm lögreglubílar á staðinn. Maðurinn fannst eftir leit í skólanum og var hann færður í lögreglubíl. 

Að sögn vitnis gekk maðurinn inn í kennslustofu  nokkrum mínútum fyrir kennslu og gyrti niður um sig og stundaði sjálfsfróun. Hróp voru gerð að manninum um að láta af þessari hegðun og hrökklaðist hann út úr stofunni. Fljótlega eftir það kom lögreglan og hóf leit að manninum í skólanum og fannst hann fljótlega. Maðurinn er líklega á þrítugsaldri. 

„Hann kom inn í stofuna, gaf ekki frá sér nein hljóð, gyrti niður um sig og byrjaði að runka sér,” segir vitni í samtali við mbl.is. Vitnið sem er jafnframt nemandi við skólann sat inni í kennslustofunni fyrir framan sex stelpur sem sátu aftast. Þegar maðurinn kom inn stóð hann nálægt stúlkunum, gyrti niður um sig og þau hrópuðu á manninn að hætta þessu sem hann gerði ekki strax. Stelpurnar forðuðu sér út í horn. „Ég stóð upp og var hvassari við hann og þá var eins og hann áttaði sig á því sem hann var að gera og hann fór út,“ segir nemandinn. 

Á sama tíma kom annar nemandi inn í stofuna og hann hringdi á lögregluna. Lögreglan kom fljótlega á staðinn og leitaði mannsins. Hann fannst skömmu síðar, líklega inni á klósetti og var handjárnaður og leiddur út í lögreglubíl. 

Skömmu áður en maðurinn fór inn í stofuna reyndi hann að grípa í eina stúlkuna og neyða inn á klósett. „Þegar ég kom fyrst inn í stofuna var ein af stelpunum að lýsa því að hún hefði hitt hann fyrr og hann reynt að grípa í hana. Þær voru að tala um þetta þegar maðurinn kom inn í stofuna,“ segir vitnið. 

Nemendurnir könnuðust ekki við manninn. Eftir skýrslutöku var þeim boðin áfallahjálp.

Fréttin hefur verið uppfærð 

mbl.is