„Salan hefur eftir því sem ég best veit gengið vel og fólk hefur tekið björgunarsveitafólki vel í dag. Við erum voðalega lukkuleg með viðtökurnar eins og alltaf,“ segir Davíð Már Bjarnason, upplýsingafulltrúi Landsbjargar, í samtali við mbl.is.
Landssöfnun björgunarsveita Slysavarnarfélagsins Landsbjargar, Neyðarkall björgunarsveitanna, hófst í dag og stendur yfir til 3. nóvember. Björgunarsveitafólk mun næstu daga standa vaktina á fjölförnum stöðum og selja Neyðarkallinn, sem í ár er kvenkyns björgunarsveitarmaður með dróna.
„Það er ótrúlegt hvað fólk er duglegt að standa á bakvið björgunarsveitirnar og standa með þessum málstað og við fögnum því. Við höldum áfram að selja á morgun og fram á laugardag og við hlökkum til að hitta fólk,“ bætir Davíð við.
Drónar eða flygildi hafa reynst björgunarsveitum vel í verkefnum þeirra undanfarin ár og fleiri og fleiri sveitir hafa tekið slík tæki í notkun. Margar björgunarsveitir eru nú með hópa af sjálfboðaliðum sem sérhæfa sig í notkun dróna við leit að fólki, segir í tilkynningu Landsbjargar frá því í dag.
Hagnaður af sölu Neyðarkallsins rennur beint til björgunarsveita og verður notaður til að efla búnað og styrkja þjálfun björgunarsveitarmanna landsins, en rekstur björgunarsveitanna er dýr þrátt fyrir að allir björgunarsveitamenn séu sjálfboðaliðar.