Mikilvægara að fá hæfa umsækjendur annars staðar en á RÚV

Brynjar Níelsson þingmaður Sjálfstæðisflokksins.
Brynjar Níelsson þingmaður Sjálfstæðisflokksins. mbl.is/Árni Sæberg

Brynjar Níelsson, þingmaður Sjálfstæðisflokksins, gerði þá ákvörðun stjórnar RÚV að birta ekki lista með nöfnum umsækjenda um stöðu útvarpsstjóra að umfjöllunarefni á Alþingi í dag undir liðnum störf þingsins.

Magnús Geir Þórðar­son lét af starf­i útvarpsstjóra um miðjan mánuð og gegnir  Mar­grét Magnús­dótt­ir, skrif­stofu­stjóri RÚV, nú starfinu tímabundið.

Ástæða þess að stjórn RÚV ákvað að birta ekki listann er sögð sú að það geti hindrað hæfa einstaklinga í að sækja um starfið.

„Þetta er mjög sérstakt í ljósi þess að þessi ágæti fjölmiðill hefur verið upptekinn af gegnsæi annars staðar, sem greinilega gildir ekki um það sjálft,“ sagði Brynjar.

Kvaðst Brynjar þó í sjálfu sér sammála stjórn RÚV um að það geti verið mikilvægt að birta ekki lista umsækjenda. „Ég held að það ætti líka að gilda annars staðar í stjórnsýslunni og dómssýslunni.“

Að sínu mati væri það raunar mikilvægara að mjög hæfir umsækjendur fáist í slík störf, en  hjá Ríkisútvarpinu. „Miklu mikilvægara,“ bætti hann við.

Þingheimur ætti því að taka til umfjöllunar hvort ekki eigi að breyta lögunum og heimila með beinum hætti, bæði í stjórnsýslunni og annars staðar, að verði ekki birtur listi umsækjenda.

mbl.is