Allan Sigurðsson fór með UN Women til Malaví í fyrra og myndaði ungar stúlkur sem höfðu verið þvingaðar í hjónaband. UN Women selur nú jólastjörnu og mun ágóðinn nýtast í menntun stúlkna sem hafa verið leystar úr þvinguðum barnahjónaböndum.
„Við vorum að safna heimildaefni um þvinguð barnahjónabönd í Malaví til þess að geta notað í herferðir gegn þeim. Við hittum stelpur sem höfðu verið þvingaðar í barnahjónabönd og einnig stelpur sem höfðu losnað úr þeim. Við hittum líka höfðingja og mæðrahópa sem hjálpa stelpum að losna. Mitt hlutverk var að taka upp myndbönd og svo tók ég líka ljósmyndir,“ segir Allan.
„Ég myndaði eina stúlku sem var föst í barnahjónabandi. Hún kom bara heim úr skólanum einn daginn og var þvinguð sautján ára í hjónaband. Hún er nú eldri og á eitt barn og langaði ekki í annað. Þetta er hræðilegur veruleiki hjá þessum stúlkum og ungu konum,“ segir hann.
„Annarri stúlku sem við hittum var bjargað úr hjónabandi og býr nú hjá foreldrum sínum og fer í skóla,“ segir Allan.
„Á síðustu tæplega þremur árum er búið að rifta 3.500 barnahjónabönd. Það sem UN Women er að gera er að reyna að fræða fólkið þarna; foreldra, höfðingja og stjórnvöld,“ segir hann.
„Maður fann það svo innilega á þeim stúlkum sem enn voru í hjónabandi hvað þeim leið ömurlega. Þegar þær eru þvingaðar í hjónaband er í raun verið að nauðga þeim aftur og aftur. Þær eru ótrúlega brotnar þessar stúlkur.“
Undanfarin ár hefur UN Women á Íslandi boðið fólki að kaupa táknræna jólagjöf sem styður við verkefni UN Women á heimsvísu. Í ár var ákveðið að halda áfram að styðja við verkefni UN Women í Malaví sem hefur það að leiðarljósi að uppræta þvinguð barnahjónabönd.
Jólastjarnan kostar 3.500 krónur og dugar sú upphæð stúlku sem leyst hefur verið úr þvinguðu barnahjónabandi fyrir námsgögnum og skólabúningi í eitt skólaár.
Hægt er að kaupa jólastjörnuna í vefverslun UN Women á unwomen.is eða á skrifstofunni.
Greinin í heild er í Sunnudagsblaði Morgunblaðsins um helgina.