Stefán Eiríksson, borgarritari og fyrrverandi lögreglustjóri á höfuðborgarsvæðinu, er meðal umsækjenda um starf útvarpsstjóra, samkvæmt frétt Kjarnans, sem hefur eftir heimildum. Sjálfur vildi hann þó ekki tjá sig um málið þegar eftir því var leitað.
41 sótti um starfið en búist er við því að tilkynnt verði um nýjan útvarpsstjóra í næstu viku.
Starfið var auglýst laust til umsóknar 15. nóvember eftir að Magnús Geir Þórðarson sagði starfi sínu lausu og var svo skipaður Þjóðleikhússtjóri frá og með áramótum. Capacent hefur umsjón með ráðningarferlinu, en nöfn umsækjenda hafa ekki verið gefin upp.