Áhöfnin á varðskipinu Þór fór í gærmorgun og aðstoðaði áhöfn seglskútu sem átti í vandræðum með að sigla inn til Reykjavíkur vegna slæms veðurs og hafði óskað eftir fylgd síðasta spölinn. Þór var í grenndinni og kom skömmu síðar að skútunni.
Samkvæmt tilkynningu frá Landhelgisgæslunni voru þrír um borð í skútunni, en stög í mastri voru skemmd sem og seglabúnaður eftir veðrið í gærmorgun þegar vindhraði fór yfir 40 hnúta á svæðinu.
Þór lónaði fram fyrir skútuna og var skipstjóri hennar beðinn um að halda sig í skjóli rétt aftan við varðskipið og fylgja því eftir. Fylgdinni lauk eftir rúmlega klukkustundar siglingu skammt suður af Engey. Þá hélt skútan til hafnar og skipstjórinn þakkaði kærlega fyrir aðstoðina.