Af ráðherrum ríkisstjórnarinnar eru flestir ánægðir með störf Katrínar Jakobsdóttur forsætisráðherra, en rúmlega 59% landsmanna eru ánægð með störf hennar. Þar á eftir kemur Lilja Dögg Alfreðsdóttir, mennta-og menningarmálaráðherra, en nær 54% eru ánægð með störf hennar, en auk þess eru fæstir óánægðir með störf hennar.
Þetta kemur fram í nýjum Þjóðarpúlsi Gallup.
Í þriðja og fjórða sæti eru Þórdís Kolbrún R. Gylfadóttir, ferðamála-, iðnaðar- og nýsköpunarráðherra, og Svandís Svavarsdóttir heilbrigðisráðherra, en um 46% eru ánægð með störf þeirra.
Á hæla þeim kemur Bjarni Benediktsson, fjármála-og efnahagsráðherra, en nær 43% eru ánægð með störf hans, þá Sigurður Ingi Jóhannsson, samgöngu-og sveitarstjórnarráðherra, en nær 39% eru ánægð með störf hans, og Áslaug Arna Sigurbjörnsdóttir dómsmálaráðherra en um 37% eru ánægð með störf hennar, að því er segir í púlsinum.
Tæplega 35% eru ánægð með störf Guðmundar Inga Guðbrandssonar, umhverfis- og auðlindaráðherra, Ásmundar Einars Daðasonar, félags-og barnamálaráðherra, og Guðlaugs Þórs Þórðarsonar, utanríkis- og þróunarsamvinnuráðherra, en aðeins rúmlega 10% eru ánægð með störf Kristjáns Þórs Júlíussonar, sjávarútvegs-og landbúnaðarráðherra.
Hvað varðar óánægju eru langflestir óánægðir með störf Kristjáns Þórs, eða nær 62%.
Rúmlega 35% eru óánægð með störf Áslaugar Örnu og Bjarna Benediktssonar, rúmlega 31% með störf Guðmundar Inga, 28% eru óánægð með störf Guðlaugs Þórs, nær 27% með störf Ásmundar Einars og nær 26% með störf Svandísar og Sigurðar Inga.
Þær þrjár sem flestir eru ánægðir með eru einnig fæstir óánægðir með. Slétt 21% er óánægt með störf Katrínar, rúmlega 18% eru óánægð með störf Þórdísar Kolbrúnar og rúmlega 17% eru óánægð með störf Lilju Daggar, að því er fram kemur í Þjóðarpúlsi Gallup.