Víðir Reynisson yfirlögregluþjónn hjá ríkislögreglustjóra er kominn í sóttkví, þar sem hann var í samskiptum við smitaðan einstakling fyrr í vikunni. Verður hann því ekki viðstaddur á upplýsingafundi almannavarna sem hefst klukkan 14 í dag. Þetta staðfestir Jóhann K. Jóhannsson, samskiptastjóri almannavarna.
Í hans stað mætir Sigríður Björk Guðjónsdóttir ríkislögreglustjóri og fer hún yfir gang mála með Þórólfi Guðnasyni sóttvarnarlækni.
Engir aðrir starfsmenn almannavarna voru sendir í sóttkví í kjölfar þessa en Jóhann tekur fram að starfsmenn leggi ríka áherslu á smitvarnir í sínum störfum.