Alls greindust 37 ný kórónuveirusmit innanlands í gær, þar af 31 í einkennasýnatökum og 6 í sóttkvíar- og handahófsskimun.
Af þeim sem greindust voru 11 í sóttkví. Voru því 26 utan sóttkvíar.
3 smit greindust við landamærin og er mótefnamælingar beðið í öllum tilvikum.
605 manns eru í einangrun með virk smit og 1.845 í sóttkví. Í skimunarsóttkví eru 1.577 manns.
13 eru á sjúkrahúsi, þar af þrír á gjörgæslu og tveir þeirra í öndunarvél. Fólkið sem liggur á Landspítala vegna COVID-19 er á breiðu aldursbili. Sá yngsti er á þrítugsaldri og sá elsti á sjötugsaldri. Þeir sem eru á gjörgæslu eru á sextugs og sjötugsaldri.