Útlit fyrir hægviðri á landinu í kvöld og að það frysti allvíða en þá eru líkur á að hálka myndist á vegum. Þetta kemur fram í viðvörun á vef Veðurstofu Íslands.
Á vef Vegagerðarinnar kemur fram að það eru hálkublettir á fjallvegum á Vestfjörðum en hálka og hálkublettir á fjallvegum á Vesturlandi, Norðaustur- og Austurlandi. Snjór á Fjarðarheiði.
„Það dregur úr norðaustanáttinni með morgninum og eftir hádegi verður vindur víða á bilinu 5-10 m/s. Bjart að mestu á Vesturlandi, en það verða dálítil él norðan- og austanlands og skúrir með suðurströndinni. Hiti 1 til 7 stig en í kvöld lægir og frystir allvíða og þar sem enn verður blautt á eru líkur á hálku,“ segir í hugleiðingum veðurfræðings á Veðurstofu Íslands.
Veðurspá fyrir næstu daga
Hæg vestlæg eða breytileg átt og bjart með köflum á morgun en það verða stöku skúrir eða él vestan til á landinu og með norðurströndinni. Hiti 0 til 5 stig yfir daginn, en frystir aftur víða annað kvöld.
Minnkandi norðaustanátt, 5-10 m/s eftir hádegi. Bjart að mestu á Vesturlandi en dálítil él norðan- og austanlands og skúrir sunnan til. Hiti 1 til 7 stig en lægir í kvöld og frystir allvíða.
Hæg vestlæg eða breytileg átt og bjart með köflum á morgun en stöku skúrir eða él vestan til og með norðurströndinni. Hiti 0 til 5 stig yfir daginn.
Á þriðjudag:
Hæg vestlæg eða breytileg átt og bjart með köflum en stöku skúrir eða él vestanlands og með norðurströndinni. Hiti 0 til 5 stig yfir daginn.
Á miðvikudag:
Suðlæg átt 5-10 og dálítil rigning eða slydda á Suður- og Vesturlandi, hiti 1 til 6 stig. Hægari og léttskýjað norðaustan- og austanlands með hita kringum frostmark.
Á fimmtudag og föstudag:
Ákveðin suðaustan- og austanátt og rigning með köflum en þurrt að kalla norðanlands. Hiti 0 til 7 stig, mildast sunnan til.
Á laugardag (fyrsta vetrardag):
Hvöss austanátt og rigning og talsverð úrkoma um landið austanvert. Hiti 3 til 8 stig.
Á sunnudag:
Útlit fyrir breytilega átt með dálítilli vætu í flestum landshlutum.