Alls þykir 55% landsmanna mikilvægt að þjóðin fái nýja stjórnarskrá á yfirstandandi kjörtímabili, að því er fram kemur í könnun sem MMR framkvæmdi á tímabilinu 23. til 28. október 2020. Þátttakendur voru 993 talsins, 18 ára og eldri.
Bera helstu niðurstöður könnunarinnar með sér að 66% vilji að tillögur stjórnlagaráðs frá árinu 2012 verði lagðar til grundvallar frumvarpi um nýja stjórnarskrá en 88% kváðust vilja að ný stjórnarskrá feli í sér ákvæði um að náttúruauðlindir verði lýstar í þjóðareign, aukið persónukjör til Alþingis verði heimilað og ákvæði um þjóðaratkvæðagreiðslu verði lögfest í stjórnarskrá.
Þegar litið er til ríkisstjórnarflokkanna sýndi stuðningsfólk Vinstri grænna mestan stuðning við að tillögur stjórnlagaráðs og sögðust 79% þeirra vilja sjá þær lagðar til grundvallar frumvarpi að nýrri stjórnarskrá. Minni stuðningur mældist meðal Sjálfstæðisflokksins (20%) og Framsóknarflokksins (41%).