Vel hefur gengið að veita heitu vatni til höfuðborgarsvæðisins það sem af er kuldakastinu sem nú gengur yfir landið.
Þetta kemur fram í tilkynningu frá Veitum.
Notkun heits vatns hefur ekki náð þeim hæðum sem spár gerðu ráð fyrir og skýrar vísbendingar eru um að íbúar og fyrirtæki hafi tekið vel í ábendingar Veitna um að ganga vel um heita vatnið. Þannig hefur tekist að koma í veg fyrir að hitaveitan færi að þolmörkum. Álagið verður áfram mikið á hitaveituna fram á sunnudagskvöld og því er fólk áfram hvatt til að fara sparlega með heita vatnið.
Fáar tilkynningar hafa borist þjónustuvakt Veitna frá miðnætti.