Björt borgarljósin skinu fallega og spegluðu sig í Reykjavíkurtjörn þegar ljósmyndari Morgunblaðsins átti þar leið um.
Stórir kranar gnæfa yfir byggingasvæðum enda er þess vænst að athafnalíf landans komist fljótlega aftur á snúning, enda fer vonandi að sjá fyrir endann á kórónufaraldrinum.
Þá vekur ekki síður bjartsýni og gleði meðal landans að daginn er farið vel að lengja, eða um nærri klukkustund samanlagt frá vetrarsólstöðum. Ágætt veður var á landinu í gær, en kuldi er í kortunum og búast má við snjókomu á Norðurlandi.