Innlent | mbl | 28.1.2021 | 11:31 | Uppfært 11:49

Get ég verið stoltur eða var ég að þvælast fyrir?

Rögnvaldur Ólafsson og Þórólfur Guðnason voru á upplýsingafundi almannavarna í dag. Ljósmynd/Lögreglan

Það er engin ástæða til að slaka á gagnvart faraldrinum eða setja smitvarnir og ábyrga hegðun í annað sætið. Það eru vísbendingar um að fólk sé farið að slaka á, fleiri séu að hittast og í stærri hópum, sagði Rögnvaldur Ólafsson aðstoðaryfirlögregluþjónn á upplýsingafundi almannavarna.

Hann minnti á að það þurfi ekki nema eitt smit til að koma stórri bylgju af stað. Sem dæmi um það nefndi hann þróunina dagana 11.-18. september en þá greindist eitt smit, svo tvö og þrjú á þriðja degi. Næstu daga voru þau sjö talsins, svo 15 en þann 18. september voru þau 74 talsins.

Frétt af mbl.is

Tvö smit innanlands í gær

Það þyrfti því að hafa í huga að þótt staðan sé góð, sérstaklega miðað við löndin í kringum okkur, þá er hún viðkvæm og getur breyst hratt.

Hann bað fólk um að spyrja sig hvernig það ætlaði að haga sér um helgina, hvort það væri í samræmi við aðgerðir gegn hópamyndun. Þá ætti fólk að spyrja sjálft sig að því hvað það gæti sagt í framtíðinni þegar spurt er hvað það lagði af mörkum þegar faraldurinn gekk yfir.

„Get ég verið stoltur af mínu framlagi eða var ég að þvælast fyrir?“ sagði hann.