Tilkynnt var um reiðhjólaslys á Seltjarnarnesi um kvöldmatarleyti í gærkvöldi þar sem kona hafði dottið af hjóli sínu. Hún var með áverka á andliti og var flutt á bráðadeild Landspítala í kjölfarið.
Þetta kemur fram í dagbók lögreglunnar á höfuðborgarsvæðinu frá því í gærkvöldi og í nótt.
Tilkynnt var um umferðaróhapp í hverfi 108. Ökumaður vespu ók á ljósastaur og er talið að hjólið hafi síðan farið á kyrrstæða bifreið. Ökumaður vespunnar ók síðan á brott.
Greinileg ákoma er á bifreiðinni eftir hjólið er kemur fram í dagbók lögreglu.
Þá var maður í annarlegu ástandi handtekinn á veitingastað í Höfðahverfi í Reykjavík. Maðurinn er grunaður um líkamsárás, eignaspjöll og þjófnað. Sá grunaði var vistaður fyrir rannsókn máls í fangageymslu lögreglu.
Ökumenn nokkurra bifreiða voru stöðvaðir í gær og í nótt sökum gruns um akstur undir áhrifum fíkniefna, hraðaakstur og prófleysis.