Aðeins hefur dregið úr skjálftahrinunni úti fyrir Reykjanesskaga sem virðist hafa hafist um kvöldmatarleytið í gær. Skjálftarnir eru ekki stórir en þó allmargir.
Frá miðnætti hafa mælst á bilinu 10-20 skjálftar úti fyrir Reykjanesskaga og á skaganum sjálfum.
Stærstu skjálftarnir voru rétt rúmlega 2 að stærð og mældust laust fyrir klukkan eitt í nótt og rétt rúmlega tvö.
Í gær mældust tugir skjálfta úti fyrir Reykjanesskaga eins og mbl.is greindi frá seint í gærkvöldi.
Enginn gosórói mældist þó að því er náttúruvársérfræðingur Veðurstofu Íslands segir.